*کالے انگریز کی توہین عدالت*

*کالے انگریز کی توہین عدالت*

بعض اوقات چھوٹے چھوٹے کام بڑی بڑی تبدیلی کا باعث بنتے ہیں ایسا ہی کچھ ہوا آج  پنجاب کی سب سے بڑی عدالت کے منصف کے سامنے کہ ایک وکیل صاحب گاٶن کے بغیر جج صاحب کے  سامنے ساٸل کی فریاد لیے کھڑے ہوٸے تو صاحب بہادر نے یہ کہہ کر فریاد سننے سے منع کردیا کہ تم نے گاٶن نہیں پہنا لہذا تم اپنا مقدمہ پیش کرنے اہل نہیں ہو ایک سٸنیر وکیل جو پنجاب بھر کے وکلا کے نماٸندہ ادارے  پنجاب بارکونسل  کے ممبر ہیں وہ  یہ سارا منظر دیکھ رہے تھے وہ اپنے ہم پیشہ ساتھی کی مشکل سمجھ گٸے اور اس کو اپنا گاٶن اتار کر پہنا دیا بس یہ منظر دیکھنا تھا اورصاحب بہادر  اس طرح گرم ہوٸے جیسے کسی نے لوہے کا تپتا ہوا گاٶن صاحب بہادر کو پہنا دیا ہو

بس اس حرکت پر ممبر پنجاب بار کونسل پر توہین عدالت لگادی گٸی اور اس توہین امیز عمل پر تین ماہ سزا بھی سنا دی گٸی۔

کیا یہ خود توہین عدالت ،توہین وکلا اور توہین انسانيت اور بنیادی انسانی حقوق کی خلاف ورزی  نہیں کہ ایک ساٸل کو صرف اس لیے نہیں سنا گیا کہ اس کے وکیل صاحب کے یونیفارم میں سے ایک غیر ضروری چیز کم تھی جس کو  انصاف کی راہ میں بڑی رکاوٹ سمجھتے ہوٸے توہين عدالت لگا دی گٸی۔اور یوں ملک میں آٸین و قانون کی بالادستی قاٸم ہوگٸی۔

پنجاب بار کونس نے ہاٸی کورٹ کے اس نامناسب اور غیر قانونی رویے کے خلاف مورخہ 03دسمبر2022 کو پنجاب بھر میں ہڑتال کا اعلان کررکھا ہے

پنجاب بار کو چاہیے کہ روایتی ہڑتال سے آگے بڑھ کر  اس کیس کو ٹیسٹ کیس بنا دے اور انگریز کے بناٸے تمام ایسے قوانين جو کسی نا کسی طرح آج بھی انگریز کے غلام ہونے کا تاثر دیتے ہیں سب کے خاتمے تک جدوجہد جاری رکھیں۔

اور وکلا کو چاہیے کہ صرف اس ایک عمل(ایکٹ) پر ایکشن لینے کی بجائے ان اصول و ضوابط کے خلاف سخت ردعمل دیں ”ڈوسو بنام سرکار“ کیس کی طرح سزا کی بجاٸےسزا دینے والے قانون کو ہی چیلنج کردیں 

کہ یہ گاٶن یونیفارم کا حصہ کیوں ہے؟ 

انصاف کے حصول  کے لیے کوٹ پر گاٶن پہننا کیوں ضروری ہے؟ 

پنجاب کی سخت گرمی جون، جولاٸی کے مہینوں میں بھی سفید شرٹ پر سیاہ موٹا کوٹ پہننا کیوں ضروری ہے؟

سخت گرمی میں جب حبس (ہیٹ ویو) سے لوگ بےہوش ہوکر مررہے ہوتے ہیں وکلا کے لیے تب بھی گلے پر نک ٹاٸی باندھنا کیوں ضروری ہے؟

اگر انصاف کے بول بالا یا قانون کی بالا دستی کے لیے معاون و مدگار ثابت ہوتا ہے تو ٹھیک ہے جاری رکھیں 

اگر صرف انگریز کی غلامی کا طوق سمجھ کر ہی پہنا جارہاہے تو اسے اتار پھینکنا چاہیے اپنےقومی لباس سفید شلوار قمیض کو یونیفارم کا حصہ بنانا چاہیے۔

معزز عدلیہ کو  کالے انگریز بننے کا اتنا شوق ہے کہ سخت گرمی میں بھی کوٹ اور گاٶن نہیں اتار سکتے جبکہ AC مزید تیز کرسکتے ہیں۔

اٸرکنڈیشنر (AC)سے منٹو کا مشہور زمانہ افسانہ یاد آیا مختصراً ! منٹو لکھتا ہے کہ میں ایک بار طواٸف کے کوٹھے پر گیا وہ سخت گرمی میں بھی تیز اٸیر کنڈیشنر چلا کر کمبل اوڑھے لیٹی تھی میں نے اسے کہا کہ تم کمبل اوڑھے بیٹھی ہو کیا ہی اچھا اگر AC بند کر دو تو اس کا آگےجواب تھا بجلی کا بل کونسا میں نے ادا کرنا ہے 

پھر کچھ عرصہ ہوا میں کسی کام کے سلسلے میں اسسٹنٹ کمشنر صاحب کے دفتر گیا وہاں بھی کمشنر صاحب سخت گرمی میں دو دو اٸیر کنڈیشنر چلا کر کوٹ پہنے ٹھٹھر رہے تھے میں نے کہا کیا ہی اچھا ہو AC بند کردیں یا آہستہ کرلیں آگے سے جواب تھا کہ اس کا بل کونسا میں نے ادا کرنا۔تب مجھے اندازہ ہوا طواٸف کےکوٹھے اور کمشنر صاحب کے دفتر میں کوٸی فرق نہیں

ایسا ہی حال ہماری معزز عدلیہ کا ہے 

تقریروں میں تو دعوے کرتے ہیں کہ ہم آزاد عدلیہ ہیں ہم پر کسی کا کوٸی پریشر نہیں جبکہ حقیقت یہ ہے کہ انگریز کے جانے کے 75سال بعد  موسم اور اپنے خطے کی مناسبت سے یونیفارم نہیں بدل سکتے

اسی طرح سفید پگڑی پنجاب کے بزرگوں اور پنچاٸیت میں عزت و توقیر کی علامت سمجھا جاتا ہے  اور جناح کیپ بانی پاکستان قاٸداعظمؓ کی نسبت سے ایک خاص مقام رکھتی ہے اور ان دونوں علامتوں کو عدالتوں کے باہر آوازیں لگانے والے کے سرپر سجا دیا گیا ہے 

کیا یہ قومی لباس اور جناح کیپ کی توہين نہیں ہے؟ 

یونین جیک سے آزادی حاصل کرنے والے اکثر ممالک نےانگریزی لباس اور انگریز سرکار کے لیے مخصوص سابقے لاحقوں پر پابندی لگا دی تھی 

کیا ایک گاٶن کی تبدیلی پر ”توہین عدالت“ لگانے والےمنصفوں سے کوٸی پوچھنے کی جسارت کرسکتا ہے کہ اشرافیہ کے کیسزز ہوں تو آدھی رات کو اور چھٹی کے دن بھی عدالتوں کے تالے کھل جاٸیں جبکہ غریب سارا دن عدالت کی دہلیز کے ساتھ چپکا بیٹھا رہتا کہ ناجانے کب منصف کی پکارآجاٸے تھوڑی دیر ہونے پرکہیں میں انصاف سے محروم نا راہ جاٶں جبکہ سارا دن انتظار کرنے پر آواز آتی ہے Left Over ۔

کیا یہ توہین انصاف و انسانيت نہیں ؟ اگر سننا نہیں تھا تو بلایا کیوں تھا؟